Friday, May 14, 2010

Sweating (Perspiration) ချွေးထွက်ခြင်း

ချွေးထွက်တဲ့အိတ် (Sweat glands) ရှိတဲ့အကောင်တိုင်းကနေ ရေနဲ့ဓါတ်ဆားတွေကို အရေပြားကနေ ထုတ်ပေးနိုင်တယ်။ Transpiration, Diaphoresis လို့လဲ ဆေးစကားမှာ သုံးတယ်။ လူတွေမှာ ချွေးထွက်ပေးပြီး ကိုယ်ရဲ့အပူချိန်ကို ထိန်းညှိတာပါ။ ချွေးထွက်ရင် အေးသွားစေတယ်။

ဒါတင်မကဘဲ ယောက်ျားတွေ ထွက်တဲ့ချွေးဟာ ဆန့်ကျင်ဘက်လိင်ကို ဆွဲဆောင်မှု သဘောဆောင်တဲ့ pheromone ကိုပါ ထုတ်တယ်လို့ ယုံကြည်ကြတယ်။ ဒီအစွမ်းဟာ သေးငယ်တဲ့ အကောင်လေးတွေမှာ သိသိသာသာရှိတာမျိုးဖြစ်တယ်။

ချွေးထွက်တာက အိုက်မှသာ မဟုတ်ပါ။ ပျို့လာတဲ့အခါ၊ ဂဏာမငြိမ်ဖြစ်တဲ့အခါတွေမှာလဲ ထွက်တယ်။ ချွေးထွက်နည်းတဲ့ အကောင်ထဲ ခွေးလည်းပါတယ်။ မြင်းကတော့ လူလိုဘဲ ဂျိုင်းက ချွေးထွက်တယ်။ ချွေးထွက်များတာကို Hyperhidrosis လို့ခေါ်တယ်။ ချွေးထွက်စေအောင်လုပ်ပေးတာက အရေပြားပေါ်မှာရှိတဲ့ အပူချိန်ကိုသိတဲ့ အာရုံခံနဲ့ ဦးနှောက်ထဲက Hypothalamus နေရာတွေက ဖြစ်တယ်။ စိတ်လှုတ်ရှားမှုကြောင့်ထွက်တဲ့ချွေးက လက်ဖ၀ါး၊ ခြေဖ၀ါး၊ နဖူးတွေကသာ ထွက်တတ်ပြီး၊ ကိုယ်လက်လှုတ်ရှားလို့ ထွက်တာက တကိုယ်လုံးက နေထွက်တယ်။

ချွေးထဲဘာတွေပါတယ်ဆိုတာ တယောက်နဲ့တယောက်မတူဘူး။ ရေ၊ Lactate နဲ့ Urea ဆိုဒီယံ၊ ပိုတက်ဆီယံ၊ ကယ်လ်စီယံ၊ မက်ဂနီဆီယံ၊ စတာတွေပါတယ်။ တနေ့တနေ့ ချွေးကနေ ရေ ကုန်သွားတာဟာ (၁၀၀) ကနေ (၈၀၀၀) မီလီလီတာအထိရှိတယ်။ ဓါတ်ဆားကလည်း ၃၅၀ (မီလီမိုးလ်)၊ ဆိုဒီယံ ၃၀-၆၅ (မီလီမိုးလ်) စတာတွေ ထွက်စေတယ်။

ချွေးထွက်လွန်တာကို Hyperhidrosis ခေါ်တယ်။ လွန်တယ်ဆိုတာကလည်း တကိုယ်လုံးနဲ့ လက်၊ ခြေ၊ ဂျိုင်း၊ ပေါင်ခြံ၊ နေရာတခုခုဆိုပြီး မတူဘူး။ မွေးရာပါနဲ့ နောက်မှဖြစ်တာ ၂ မျိုးရှိတယ်။ မွေးရာပါတွေက ငယ်ကတည်းကဖြစ်တယ်။ ကြီးမှဖြစ်သူတွေဆိုရင် Thyroid လည်ပင်းအကြိတ်၊ Pituitary ဦးနှောက်အကြိတ်၊ ဆီးချို၊ Tumors ကင်ဆာ၊ Gout ဂေါက်ရောဂါ၊ သွေးဆုံးတာ၊ မာကြူရီအဆိပ်သင့်တာ နဲ့ ဆေးဝါးတွေကြောင့်ဖြစ်နိုင်တယ်။

ရောဂါမရှိဘဲ ချွေးထွက်များသူတွေမှာ စိတ်လှုတ်ရှားမှု၊ အစားအသောက်၊ အနံ့အသက်တွေကလည်းဖြစ်စေတယ်။ Aluminium chloride ဆေးကို ဂျိုင်းချွေးထွက်များသူတွေကိုပေးတယ်။ ၃-၅ ရက်ပေးပြီး သက်သာတာကို ကြည့်ဘို့ လိုတယ်။ ချွေးထွက်တဲ့အိတ်တွေကို Botulinum toxin A ထိုးဆေးပေးရင် ၄-၉ လခံတယ်။ စားဆေးထဲမှာ Oxybutynin (Ditropan) ဆိုတဲ့ ဆီးမထိန်းနိုင်သူတွေကိုပေးတဲ့ဆေး။ Glycopyrrolate (Robinul), Propantheline bromide (Probanthine), Benzatropine (Cogentin) ဆေးတွေလည်းပေးနိုင်တယ်။ စိတ်လှုတ်ရှားမှုကြောင့် ဆိုရင် Antidepressants နဲ့ Anxiolytics ဆေးတွေပေးရတယ်။ ခွဲစိတ်ကုသနည်းမှာ (ETS) နည်းနဲ့ အာရုံကြောတမျိုးကို ဖြတ်ပေးရတာပါ။

No comments:

Post a Comment